Цөлжилттэй тэмцэх тухай НҮБ-ын Конвенцын Хэрэгжилтийг хянах хорооны 23 дугаар хурал Панам улсад хоёр дахь өдрөө үргэлжилж байна. Тэгвэл Конвенцын Хэрэгжилтийг хянах хороо (CRIC) нь Цөлжилттэй тэмцэх тухай НҮБ-ын Конвенцын хүрээнд Талуудын авсан үүргийн хэрэгжилт, газрын доройтлыг бууруулах, ган, хуурайшилтад дасан зохицох болон газрын тогтвортой менежментийн явцыг хянаж, үнэлэх үндсэн дэд байгууллага юм.
- CRIC нь Талуудын бага хурлын үеэр болон түүний хооронд жилд нэг удаа хуралддаг бөгөөд улс орнуудын хэрэгжилтийн явц, тулгамдаж буй бэрхшээл, бодлогын чиглэл, шийдлийг урьдчилан хэлэлцэх чухал талбар юм. Хуралдаанд 197 Талууд, НҮБ-ын байгууллагууд, бүс нутгийн болон олон улсын санхүүгийн байгууллагууд, иргэний нийгэм, шинжлэх ухааны салбарынхан өргөнөөр оролцдог. Энэ үеэр сэдэвчилсэн хэлэлцүүлэг, дагалдах арга хэмжээнүүд өрнөдөг нь ирэх COP-ийн хэлэлцээрийн чиглэлийг тодорхойлоход онцгой ач холбогдолтой.
- CRIC23 нь Эр-Риядаас Улаанбаатар луу чиглэсэн замналын стратегийн үед болж буй бөгөөд COP16-гийн шийдвэрийн хэрэгжилт, шар шороон шуурга, жендэрийн бодлого зэрэг асуудлын ахицыг үнэлэх боломжийг олгож байна. Мөн 2030 оноос хойших стратегийн хүрээний анхны саналуудыг хэлэлцэх, Жендэрийн хурал болон “Tafa’ul” гангийн үйл явцын анхны сайн дурын яриаг зохион байгуулах зэрэг үйл ажиллагааг хамарна. Эдгээр дүгнэлт нь COP17-д хэлэлцэх шийдвэрийн төсөл боловсруулахад шууд нөлөөлөх юм.
- Монгол Улсын хувьд, COP17-ын ирээдүйд даргалах үүрэг гүйцэтгэхийн хувьд CRIC23 нь онцгой ач холбогдолтой. Энэ нь бүс нутгууд болон Талуудын хүлээлт, хэрэгцээ, анхаарах асуудлыг урьдчилан сонсож, COP17-ын хэлэлцэх асуудлын улс төр, техникийн зураглалыг тодорхойлоход тусална. Түүнчлэн Монгол Улсад нэн чухал сэдэв болох бэлчээр, нүүдлийн мал аж ахуй, гандуу бүсийн тэсвэржилтийг олон улсын хэлэлцүүлэгт онцлон гаргах боломжийг бүрдүүлнэ. Тэрчлэн CRIC23 нь түншлэл бэхжүүлэх, санхүү, шинжлэх ухааны механизмтай уялдааг сайжруулах, үндэсний байгууллагуудын бэлтгэлийг хангахад шийдвэрлэх үе шат болж байна.
