Байгаль орчин, уур амьсгалын өөрчлөлтийн сайд Б.Батбаатар өнөөдөр (2025.12.10) НҮБ-ын Байгаль орчны хөтөлбөр (UNEP)-ийн Гүйцэтгэх захирал Ингрид Андерсонтой уулзаж, санал солилцлоо.
Уулзалтын эхэнд НҮБ-ын Байгаль орчны хөтөлбөр (UNEP)-ийн Гүйцэтгэх захирал хатагтай Ингрид Андерсон Монгол Улсын төлөөлөгчдийг НҮБ-ын Байгаль орчны Ассемблейн 7 дугаар чуулганы яриа, хэлэлцээрүүдэд маш идэвхтэй оролцож, манлайлал үзүүлж байгаад талархал илэрхийлэв.
Сайд Б.Батбаатар байгаль орчны салбарт эрчимжүүлж буй хамтын ажиллагаандаа сэтгэл хангалуун байдгаа илэрхийлээд Цөлжилттэй тэмцэх тухай НҮБ-ын конвенцын Талуудын 17 дугаар бага хурлын үеэр Монгол Улсаас “Бэлчээр”, “Ус ба газар”, “Байгальд суурилсан шийдэл” зэрэг санаачилж байгаагаа танилцууллаа.
Мөн Б.Батбаатар сайдын зүгээс ирэх оны 8 дугаар сарын 17-28-нд болох Талуудын 17 дугаар бага хуралд хатагтай Ингрид Андерсоныг биечлэн оролцохыг албан ёсоор урив. Энэ үеэр Монгол Улс UNEP-тэй хамтран хэрэгжүүлсэн болон үргэлжилж буй ажил, төсөл, хөтөлбөрүүдийн үр дүнг хамтдаа олон улсын түвшинд танилцуулах боломжтойг дурдав.
Уулзалтын төгсгөлд НҮБ-ын Байгаль орчны хөтөлбөрийн зүгээс Монгол Улсын Засгийн газарт бэлтгэл ажлыг хангахад бүхий л дэмжлэгээр ханган ажиллахаа илэрхийлээд Гүйцэтгэх захирал өөрийн биеэр Цөлжилттэй тэмцэх тухай НҮБ-ын конвенцын Талуудын 17 дугаар бага хуралд оролцохоо баталгаажуулав.
